ಪಕ್ಕದ ಮನೆಯ ಮಗುವೊಂದು ಜಾತ್ರೆಯಲ್ಲಿ ಸಿಗುವ ಪ್ಲಾಸ್ಟಿಕ್ಕಿನ ಬೈನಾಕ್ಯೂಲರ್ ಹಿಡಿದು ಆಟವಾಡುತ್ತಿತ್ತು. ಪದೇ ಪದೇ ಕಣ್ಣಿಗೆ ಹಿಡಿದುಕೊಂಡು ಮುಂದಿನ ನಾಬನ್ನು ತಿರುಗಿಸಿ ವಸ್ತುಗಳನ್ನು ಹತ್ತಿರ ದೂರ ಸರಿಸುತ್ತಾ ಏನೋ ವಿಚಿತ್ರವೊಂದು ಜರುಗುತ್ತಿದೆ, ಇಷ್ಟು ದಿನ ಗೊತ್ತಿರದ ವಿಸ್ಮಯವೊಂದು ಕೈಯಲ್ಲಿನ ಪುಟ್ಟ ಸಾಧನದಿಂದಾಗುತ್ತಿದೆ ಎಂದಾಗ ಅರಳುಗಣ್ಣಿನಿಂದ ತನ್ನಷ್ಟಕ್ಕೆ ತಾನೆ ನಗುತ್ತಾ ಕುತೂಹಲದಿಂದ ನೋಡುತ್ತಿತ್ತು.
ಈ ಪುಟ್ಟ ಮಗುವಿಗೆ ಅದೆಷ್ಟು ಕುತೂಹಲ? ಸಾಮಾನ್ಯ ಕಣ್ಣಿಗೆ ಯಾವಾಗಲು ಇದ್ದಲ್ಲೇ ಇದ್ದು ಸ್ಥಿರವಾಗಿರುವ ವಸ್ತುವನ್ನು ತನ್ನ ಕೈಯಲ್ಲಿರುವ ಸಾಧನದಿಂದ ಸಮೀಪದಿಂದ ನೋಡಬಹುದು ಎಂದಾಗ ಆಶ್ಚರ್ಯ ಸಹಜ ಅಲ್ವಾ? ಇಷ್ಟು ಪುಟ್ಟ ಮಗುವಿಗೆ ಕುತೂಹಲ ಕಾಡುವಾಗ ಇನ್ನು ಅನಾದಿ ಕಾಲದಿಂದ ಆಕಾಶದಲ್ಲಿ ಮಿನುಗುವ ನಕ್ಷತ್ರಗಳು, ಹಗಲು ಉರಿದು ರಾತ್ರಿ ಮಾಯವಾಗುವ ಸೂರ್ಯ, ನಂತರ ತಂಪಾದ ಚಂದ್ರ ಮೂಡಿ ಬರುವುದು, ಹೀಗೆ ಹತ್ತಾರು ವಿಸ್ಮಯಗಳ ಆಗರವಾದ ಬ್ರಹ್ಮಾಂಡದ ಬಗ್ಗೆ ಕುತೂಹಲ ಮಾನವನಿಗೆ ಮೂಡದೇ ಇದ್ದೀತೆ?
ಆ ಕುತೂಹಲವೇ ಮುಂದೆ ಗೆಲೆಲಿಯೋನ ಕೈಯಲ್ಲಿ ದೂರದರ್ಶಕ ಮೂಡಿಸಿತು. ಸುಮಾರು ೪೦೦ ವರ್ಷಗಳ ಹಿಂದೆ
ಸಮರಾಂಗಣದಲ್ಲಿ ವೈರಿಗಳ ಚಲನವಲನಕ್ಕೆ ಸಿಮಿತವಾಗಿದ್ದ ದೂರದರ್ಶಕವನ್ನು ಆ ಮಗುವಿನಲ್ಲಿರುವಷ್ಟೇ ಅದಮ್ಯ ಕುತೂಹಲದಿಂದ ಅದರ ಜನಕನಾಗಿದ್ದ ಗೆಲೆಲಿಯೋ ಆಕಾಶಕ್ಕೆ ತಿರುಗಿಸಿದ. ಆತ ತಿರುಗಿಸಿದ ಕ್ಷಣಕ್ಕೆ ತಾನೊಂದು ಭವಿಷ್ಯದ ಮಹಾನ್ ವೈಜ್ಞಾನಿಕ ಕ್ರಾಂತಿಯೊಂದಕ್ಕೆ ನಾಂದಿ ಹಾಡುತ್ತಿದ್ದೇನೆ ಎನ್ನುವ ಅರಿವು ಇತ್ತೋ ಇಲ್ಲವೋ ತಿಳಿಯದು. ಆದರೆ ಭವಿಷ್ಯದಲ್ಲಿ ಅ ಕ್ಷಣ ಮಾಡಿದ ಕ್ರಾಂತಿ ಮಾತ್ರ ಊಹಿಸದಳವಾದುದು. ಚರಿತ್ರಾರ್ಹವಾದುದು, ವ್ಯೋಮ ಸಂಶೋಧನೆಗೆ ಹೆಬ್ಬಾಗಿಲು ತೆರೆದು ಇಂದು ಬ್ರಹ್ಮಾಂಡದ ರಹಸ್ಯದ ಕೀಲಿಕೈ ಹುಡುಕಲು ಮಾನವ ನಭೋಮಂಡಲಕ್ಕೆ ಪ್ರಯಾಣ ಮಾಡುವಂತಾಗಿದೆ.
ಸೌರವ್ಯೂಹವನ್ನು ಭೂಕೇಂದ್ರವಾದದ ಮಿಥ್ಯೆಯಿಂದ ಸೂರ್ಯಕೇಂದ್ರ ಎನ್ನುವ ಸತ್ಯದ ಕಡೆ ಎಳೆದು ತಂದಿದ್ದೇ ಈ ದೂರದರ್ಶಕ. ನಮಗೆ ಆಕಾಶಕಾಯಗಳನ್ನು ವೀಕ್ಷಿಸಬೇಕಾದರೆ ಅವುಗಳ ಸ್ಥಿಗತಿಗಳನ್ನು ಅರಿಯಬೇಕಾದರೆ ಭೂಮಿಯೇ ಆಧಾರ, ಎಲ್ಲ ಲೆಕ್ಕಾಚಾರಗಳನ್ನು ಇಲ್ಲಿಂದಲೇ ಮಾಡಬೇಕು, ಬೇರೆಡೆ ಹೋಗಿ ನಿಂತು ಏನನ್ನೋ ನೋಡುತ್ತೇ್ತನೆ ಮಾಡುತ್ತೇನೆ ಎನ್ನುವ ಹಾಗಿಲ್ಲ. ಭೂಮಿ ಸೇರಿದಂತೆ ಬ್ರಹ್ಮಾಂಡದ ಎಲ್ಲಾ ಕಾಯಗಳು ಒಂದು ನಿರ್ದಿಷ್ಟ ಚಲನೆಗೊಳಪಟ್ಟಿರುವುದರಿಂದ ಇಲ್ಲಿಂದಲೇ ಆತ ಆಕಾಶಕಾಯಗಳ ಮೇಲ್ಮೆ ರಚನೆ, ಅಲ್ಲಿಯ ಅನಿಲಗಳ ಸಾಂದ್ರತೆ,
ಉಪಲಬ್ಧವಿರುವ ಲೋಹಗಳು, ಹೀಗೆ ಹತ್ತಾರು ವಿಷಯಗಳನ್ನು ಅರಿಯಲು ಆತನಿಗೆ ಈ ದೂರದರ್ಶಕ ಸಾಧನ ಒಂದು ವರವಾಗಿ ಪರಿಣಮಿಸಿದೆ.
ಮುಂದಿನ ದಿನಗಳಲ್ಲಿ ಈ ದೂರದರ್ಶಕ ಹಂತ ಹಂತವಾಗಿ ಸುಧಾರಣೆ ಕಾಣುತ್ತಾ ಅನೇಕ ಸಂಶೋಧನೆಗಳಿಗೆ ನಾಂದಿ ಹಾಡುತ್ತಾ ಹೋಯಿತು. ಒಂದಿಷ್ಟು ಕುತೂಹಲ ತಣಿಸಿದರೆ, ಇನ್ನೂ ತಿಳಿಯಬೇಕು ಎನ್ನುವ ಆಸೆ ಕುದುರಿಸಿ ಸಂಶೋಧನೆಗಳಿಗೆ ಮುನ್ನುಡಿ ಬರೆಯುತ್ತಾ ಹೋಯಿತು. ಮಾನವ ಕುಲದ ಮಹಾಜಿಗಿತ ಎಂದು ಹೆಸರು ಪಡೆದ ಮಾನವನ ಮೊದಲ ಚಂದ್ರ ಸ್ಪರ್ಶದಲ್ಲಿ ದೂರದರ್ಶಕದ ಪಾತ್ರ ಮರೆಯಲು ಸಾಧ್ಯವೇ?
೧೬೦೦ರ ಮಧ್ಯ ಭಾಗದಲ್ಲಿ ಗೆಲೆಲಿಯೋ ರೂಪಿಸಿದ ದೂರದರ್ಶಕ ಸೀಸದ ಕೊಳವೆಗೆ ಎರಡು ತುದಿಯಲ್ಲಿ ಪೀನ ಮಸೂರ ಮತ್ತು ನಿಮ್ನ ಮಸೂರ ಅಳವಡಿಸಿದ್ದಾಗಿತ್ತು. ಅಂದರೆ ಎರಡು ಮಸೂರಗಳ [LENCE] ನಡುವಿನ ಅಂತರವನ್ನು ಹೆಚ್ಚು ಕಡಿಮೆ ಮಾಡುತ್ತಾ ದೂರದ ವಸ್ತುವಿನ ಸ್ಪುಟವಾದ ಚಿತ್ರ ಕಾಣುವಂತೆ ವಿನ್ಯಾಸಗೊಳಿಸಲಾಗಿತ್ತು. ಇದು ಬೆಳಕಿನ
ವಕ್ರೀಭವನದ[REFRACTION] ನಿಯಮದ ಅಧಾರದ ಮೇಲೆ ಕೆಲಸ ಮಾಡುತ್ತಿತ್ತು. ಸೀಸದ ಕೊಳವೆಗೆ ಮೊದಲು ಕಣ್ಣಿಟ್ಟು ನೋಡಲು ಇದ್ದದ್ದು ನಿಮ್ನ ಮಸೂರ. ಮತ್ತೊಂದು ತುದಿಯಲ್ಲಿ ಜೋಡಿಸಿದ್ದು ಪೀನ ಮಸೂರ. ಇದು ನೇರವಾಗಿ ನೋಡುವ ವಸ್ತುವಿನ ಮೇಲೆ ಕೇಂದ್ರೀಕೃತವಾಗಿ ಅದರ ಚಿತ್ರವನ್ನು ಮೂಡಿಸುತ್ತಿತ್ತು, ವಸ್ತುವಿನ ಬಿಂಬದ ಹಿಗ್ಗಿಸುವಿಕೆ ಹಾಗೂ ಕುಗ್ಗಿಸುವಿಕೆ ಎರಡು ಮಸೂರಗಳ ನಡುವಿನ ದೂರವನ್ನು ಅವಲಂಬಿಸುತ್ತಿತ್ತು.
ಮಸೂರಗಳಲ್ಲಿ ಬೆಳಕು ಹಾದಾಗ ಮಸೂರದ ಗುಣಧರ್ಮಕ್ಕನುಗುಣವಾಗಿ ಬೆಳಕು ವಕ್ರೀಭವಿಸುತ್ತದೆ. ಗಾಜಿನ ತೊಟ್ಟಿಯಲ್ಲಿ ನೀರು ತುಂಬಿ ಒಂದು ಕೋಲನ್ನು ಮುಳುಗಿಸಿದರೆ ಹೇಗೆ ಮುಳುಗಿದ ಭಾಗ ಬಾಗಿದಂತೆ ಕಾಣುತ್ತದೆ ಎನ್ನುವುದನ್ನು ಹೈಸ್ಕೂಲಿನಲ್ಲಿ ಕಲಿತದ್ದು ನೆನಪಿರಬಹುದು. ಬೆಳಕು ವಾತಾವರಣದಿಂದ ಮತ್ತೊಂದು ಮಾಧ್ಯಮದಲ್ಲಿ ಹಾದು ಹೋಗಬೇಕಾದರೆ ಅದು ಬಾಗುತ್ತದೆ, ಅದು ಎಷ್ಟು ಬಾಗುತ್ತದೆ ಎನ್ನುವುದು ಬೆಳಕು ಹಾಯುವ ಮಾಧ್ಯಮದ ಅಣುವಿನ ಸಾಂದ್ರತೆ ಹಾಗೂ ಅದರ ದ್ರವ್ಯರಾಶಿಯನ್ನು ಅವಲಂಬಿಸಿರುತ್ತದೆ.
ಈ ತರಹದ ದೂರದರ್ಶಕಕ್ಕೆ ಒಂದಿಷ್ಟು ಮಿತಿಗಳಿದ್ದ ಕಾರಣ ಅದನ್ನು ನಿವಾರಿಸಲು ಈ ಯಂತ್ರಗಳನ್ನು ಸುಧಾರಿಸಲು ಪ್ರಯತ್ನಿಸಿದರು. ಅದರ ಫಲವೇ ವಕ್ರೀಭವನ ನಿಯಮಗಳ ಮೇಲೆ ತಯಾರಾಗುತ್ತಿದ್ದ ದೂರದರ್ಶಕಗಳ ಜಾಗದಲ್ಲಿ ಪ್ರತಿಫಲಿತ ದೂರದರ್ಶಕಗಳು ಬಳಕೆಗೆ ಬಂದು ವ್ಯೂಮಲೋಕದ ಮತ್ತಷ್ಟು ರೋಚಕ, ಅಚ್ಚರಿಗಳನ್ನು ತೆರೆದಿಡುವ ಸಾಧ್ಯತೆಗಳನ್ನು ನಿಚ್ಚಳಗೊಳಿಸಿದವು. ಇಲ್ಲಿ ಬೆಳಕು ವಕ್ರೀಭವನಗೊಳ್ಳದೆ ಪ್ರತಿಫಲಿಸುತ್ತಿದ್ದವು. ಅಂದರೆ ಪ್ರತಿಫಲಕಕಾರಗಳಾದ ಮಸೂರ ಕನ್ನಡಿಗಳು ಸೇರಿಕೊಂಡವು. ವಸ್ತುವೊಂದರ ಮೇಲೆ ಕೇಂದ್ರಿಕೃತಗೊಳಿಸಿದರೆ ಅದರಿಂದ ಪ್ರತಿಫಲಿತವಾದ ಬೆಳಕು ಮೊದಲ ಮಸೂರಗನ್ನಡಿಯ ಮೇಲೆ ಬೀಳುತ್ತದೆ. ನಂತರ ಅದು ಪುನಃ ಪ್ರತಿಫಲಿಸಿ ನೋಡುಗನ ಕಣ್ಣಿಗೆ ಸ್ಫ್ಪುಟವಾಗಿ ತಲುಪುವ ವ್ಯವಸ್ಥೆ ಇರುತ್ತದೆ. ಇಲ್ಲಿ ಮಸೂರಗಳಲ್ಲಿ ಇರಬಹುದಾದ ಬೆಳಕಿನ ಬಾಗು ಬಳಕುಗಳ ತೊಂದರೆ ಇರಲಿಲ್ಲ.
ಈಗ ಆಧುನಿಕ ಯುಗದ ವಿಜ್ಞಾನ ಬಹಳಷ್ಟು ಮುಂದುವರೆದಿದೆ. ಅನೇಕ ಅವಿಷ್ಕಾರಗಳು ಆಗಿ ಸುಧಾರಿತ, ಬೃಹತ್ಗಾತ್ರದ ದೂರದರ್ಶಕಗಳು ಲಭ್ಯವಿವೆ. ಅದರಲ್ಲೂ ಗಣಕಯಂತ್ರಗಳ ಬಳಕೆ ಬಂದ ಮೇಲಂತೂ ವಿದ್ಯುನ್ಮಾನ ಚಾಲಿತ ದೂರದರ್ಶಕಗಳು ಕೆಲಸಮಾಡುತ್ತಿವೆ. ಕ್ಷಣದಲ್ಲಿ ಕೂಡಿಸಿ, ಭಾಗಿಸಿ ಏನನ್ನೋ ಕಳೆದು, ಗುಣಿಸಿ, ಮಥಿಸಿ ಮಜ್ಜಿಗೆಯೊಳಗಿನ ಬೆಣ್ಣೆ ತೇಲಿ ಬರುವಂತೆ ಮಾಡಿ ನೋಡುವ ಕಾಯದ ಬಿಂಬ ಚಿತ್ರಗಳ ಜೊತೆ ಅನೇಕ ವೈಜ್ಞಾನಿಕ ವಿವರಗಳನ್ನು ನೀಡುವಷ್ಟು ವಿಜ್ಞಾನ ಮುಂದುವರೆದಿದೆ. ಯಾವಾಗ ಭೂಮಿಯ ಎತ್ತರದ ಕಕ್ಷೆಯಲ್ಲಿ ಮಾನವ ನಿರ್ಮಿತ ಉಪಗ್ರಹಗಳು ಸುತ್ತಲು ಪ್ರಾರಂಭಿಸಿದವೋ ಆಗ ಮಾನವನ ಕಲ್ಪನೆಯಲ್ಲಿ ಜನ್ಮ ತಳೆದಿದ್ದೇ ‘ಹಬಲ್ ಟೆಲಿಸ್ಕೋಪ್’. ಇದನ್ನು ೧೯೮೬ರಂದು ನಾಸಾ ಪ್ಲೋರಿಡಾದಿಂದ ನಭಕ್ಕೆ ಹಾರಿಸಿತು, ಹಬಲ್ ದೂರದರ್ಶಕವನ್ನು ಭೂಮಿಯ ಕೆಳ ಸ್ಥಿರ ಕಕ್ಷೆಯೊಂದರಲ್ಲಿ ಪರಿಭ್ರಮಿಸುವAತೆ ಮಾಡಿ ಬ್ರಹ್ಮಾಂಡವನ್ನು ಬೃಹತ್ಗಾತ್ರದ ಕಣ್ಣುಗಳಿಂದ ಸೂಕ್ಷö್ಮವಾಗಿ ಪರೀಕ್ಷಿಸುತ್ತಾ
ಅಲ್ಲಿನ ವಿದ್ಯಮಾನಗಳನ್ನು ಭೂಮಿಗೆ ರವಾನಿಸುವ ವ್ಯವಸ್ಥೆಯಿರುವಂತೆ ನೋಡಿಕೊಳ್ಳಲಾಗಿದೆ. ಇದರಲ್ಲಿ ಪ್ರತಿಫಲಿಸುವ ಮಸೂರ ಕನ್ನಡಿಗಳ ಜೊತೆ ಸೂಕ್ಷö್ಮವಾಗಿ ಅವಲೋಕಿಸುವ ಕ್ಯಾಮರಾಗಳನ್ನು, ಸುಧಾರಿತ ತಂತ್ರಜ್ಞಾನವನ್ನು ಅಳವಡಿಸಿ ನೇರವಾಗಿ ನಿಯಂತ್ರಣ ಕೊಠಡಿಗೆ ವಿವರಗಳನ್ನು ರವಾನಿಸುವಂತೆ ಮಾಡಲಾಗಿದೆ. ಈಗಾಗಲೇ ಅದು ಸುಮಾರು
ಸಾವಿರಾರು ಟರ್ರಾಬೈಟಿನಷ್ಟು [ಒಂದು ಟರ್ರಾಬೈಟೆಂದರೆ ಒAದರ ಮುಂದೆ ಹದಿನಾರು ಸೊನ್ನೆಗಳು] ವಿವರಗಳನ್ನು ನೀಡಿದೆ. ೨.೫ ಮೀಟರ್ ವ್ಯಾಸದ ಮಸೂರಗನ್ನಡಿಯನ್ನು ಹೊಂದಿರುವ ಇದು ಭೂಮಿಯ ಕಣ್ಣು ಎನ್ನಲಾಗಿದೆ. ಏನು ಮಾಡುವುದು? ಎಲ್ಲದಕ್ಕೂ ಒಂದು ಅಂತ್ಯವಿದೆ, ಅಂತೆಯೇ ಹಬಲ್ಗೂ ಕೊನೆಯಿದೆ, ಇನ್ನು ಇಪ್ಪತ್ತು ಮೂವತ್ತು ವರ್ಷಗಳ ನಂತರದ ಅವಧಿಯಲ್ಲಿ ಅದರ ಕಾರ್ಯಕ್ಷಮತೆ ಕುಸಿಯಲಿದೆ. ಮುಂದೆ? ಮುಂದಿನ ನಾಯಕತ್ವದ ಸ್ಥಾನ ವಹಿಸುವವರು ಯಾರು? ಎನ್ನುವ ಪ್ರಶ್ನೆ ಎದುರಾದಾಗ ಮತ್ತು ವ್ಯೋಮ ಅಧ್ಯಯನ ನಿರಂತರವಾಗಿರುವಂತೆ ಇರಲು ಅತ್ಯಂತ ಸುಧಾರಿತ, ಆಧುನಿಕ ತಂತ್ರಜ್ಞಾನ, ತಂತ್ರಾAಶಗಳನ್ನು ಹೊಂದಿರುವ ಬೃಹತ್ ಗಾತ್ರದ ಶಕ್ತಿಶಾಲಿ ದೂರದರ್ಶಕವನ್ನು ನಿರ್ಮಿಸಲಾಯಿತು ಅದೇ ಜೇಮ್ಸವೆಬ್ ಸ್ಪೇಸ್ ಟೆಲಿಸ್ಕೋಪ್!
ಡಿಸೆಂಬರ್ ೨೫ರಂದು ಕ್ರಿಸ್ಮಸ್ ದಿನ ಪ್ರೆಂಚ್ ಗಯಾನದ ಸ್ಪೇಸ್ ಸ್ಟೇಷನ್ನಿಂದ ನಭಕ್ಕೆ ಏರಿಯಾನ್-೫ ಎನ್ನುವ ರಾಕೆಟ್ ಜೇಮ್ಸ್ನ್ನು ಹೊತ್ತು ಚಿಮ್ಮಿ ತಿಂಗಳ ಪ್ರಯಾಣದ ನಂತರ ಯಶಸ್ವಿಯಾಗಿ ಕಕ್ಷೆಗೆ ಸೇರಲಿದೆ. ಅಪೋಲೊ ರಾಕೆಟ್ ಸರಣಿಯ ಯಶಸ್ಸಿನಲ್ಲಿ ಪಾತ್ರ ವಹಿಸಿದ್ದ ನಾಸಾ ಮುಖ್ಯಸ್ಥನಾಗಿ ದುಡಿದಿದ್ದ ಜೇಮ್ಸ್ ವೆಬ್ ಎನ್ನುವವರ ಹೆಸರನ್ನು ಗೌರವಾರ್ಥವಾಗಿ ಈ ದೂರದರ್ಶಕಕ್ಕೆ ಇಡಲಾಗಿದೆ. ಇದು ಕಕ್ಷೆಗೆ ಸೇರಿದಾಕ್ಷಣ ಕಾರ್ಯಾರಂಭ ಮಾಡುವುದಿಲ್ಲ, ಮೊದಲು ಭೂ ನಿಯಂತ್ರಣ ಕೊಠಡಿಗೆ ಸಂಪರ್ಕ ಸಾಧ್ಯವಾಗಬೇಕು, ಇಲ್ಲಿ ನೀಡಿದ ಸೂಚನೆಯನ್ನು ಪಾಲಿಸುತ್ತಾ ತನ್ನ ಕಾರ್ಯ ಆರಂಭಿಸಲು ಏನೆಲ್ಲಾ ಸಾಧನಗಳಿವೆಯೋ ಅದನ್ನೆಲ್ಲಾ ಸಜ್ಜುಗೊಳಿಸಿ ನಂತರ ಕಾರ್ಯ ಶುರು ಮಾಡಬೇಕು. ಇದಕ್ಕೆ ಸುಮಾರು ಆರರಿಂದ ಏಳು ತಿಂಗಳ ಸಮಯ ಬೇಕಾಗಬಹುದೆಂದು ನಾಸಾ ಹೇಳಿದೆ. ನಾಸಾ, ಯುರೋಪಿಯನ್ ಸ್ಪೇಸ್ ಏಜೆನ್ಸಿ, ಹಾಗು ಕೆನಡಾ ಸ್ಪೇಸ್ ರಿಸರ್ಚ್ ಒಟ್ಟಾಗಿ ದುಡಿದು ಸುಮಾರು ಎಪ್ಪತ್ತು ಸಾವಿರ ಕೋಟಿ ಅಂದರೆ ಹತ್ತು ಶತಕೋಟಿ ಡಾಲರ್ ವೆಚ್ಚದಲ್ಲಿ ಇದನ್ನು ನಿರ್ಮಿಸಲಾಗಿದೆ.
ಹಬಲ್ ದೂರದರ್ಶಕವು ಭೂಕಕ್ಷೆಯ ಕೆಲ ಹಂತದಲ್ಲಿ ಭೂಮಿಯನ್ನು ಸುತ್ತುತ್ತಿದ್ದರೆ, ಇದು ಭೂಮಿಯಿಂದ ಸುಮಾರು ೧೫ ಮಿಲಿಯನ್ ಕಿಲೋಮೀಟರ್ ಎತ್ತರದಲ್ಲಿ ಇದನ್ನು ಸೂರ್ಯನ ಸಮೀಪದ ಎಲ್-೨ ಕಕ್ಷೆಯಲ್ಲಿ ಸ್ಥಿರವಾಗಿ ಸೇರುವಂತೆ ಯೋಜಿಸಲಾಗಿದೆ. ಎಲ್-೨ ಎಂದರೆ ಎರಡು ಬೃಹತ್ ಆಕಾಶಕಾಯಗಳ ನಡುವಿನ ಶೂನ್ಯ ಕಕ್ಷೆಯಲ್ಲಿ ಪರಿಭ್ರಮಣ ಮಾಡುತ್ತದೆ. ಹಬಲ್ ದೂರದರ್ಶಕಕ್ಕಿಂತ ನೂರು ಪಟ್ಟು ಸಾಮರ್ಥ್ಯ ಹೊಂದಿರುವ ಇದು ನಭೋ ಮಂಡಲದ ಸೂಕ್ಷಾö್ಮತಿಸೂಕ್ಷö್ಮ ಚಲನೆಯನ್ನು ಕರಾರುವಾಕ್ಕಾಗಿ ತಿಳಿಸಲಿದೆ. ಅಷ್ಟೇಕೆ? ಅಷ್ಟು ಎತ್ತರದಲ್ಲಿದ್ದರೂ ಭೂಮಿಯಲ್ಲಿರುವ ನಮ್ಮ ಮನೆಯ ಮೇಲೆ ಒಂದು ಸಣ್ಣ ಗುಬ್ಬಿ ಹಾರಿದರೂ ಅದನ್ನು ಗಮನಿಸಬಲ್ಲದು. ನಲ್ವತ್ತು ಅಡಿಯ ದೂರದಿಂದ ನಮ್ಮ ಹತ್ತು ಪೈಸೆಯ ನಾಣ್ಯವೊಂದು ಬಿದ್ದಿದ್ದರೆ ಅದನ್ನು ಸಹ ಸ್ಫುಟವಾಗಿ ತೋರಿಸುವ ಸಾಮರ್ಥ್ಯವಿದೆಯೆಂದರೆ ಇನ್ನು ಸಾವಿರಾರು ಜ್ಯೋತಿವರ್ಷಗಳ ದೂರದಲ್ಲಿರುವ ಬೃಹದಾಕಾರದ ಆಕಾಶಕಾಯಗಳನ್ನು ಯಾವ ರೀತಿ ಪ್ರತಿಬಿಂಬಿಸಬಹುದು ಎನ್ನುವುದನ್ನು ಯೋಚಿಸಬಹುದು. ೬.೫ ಅಡಿ ವ್ಯಾಸದ ಚಿನ್ನದ ಹಾಗು ಬೇರಿಯಂ ಲೇಪಿತ ಕನ್ನಡಿಗಳನ್ನು ಹೊಂದಿದೆ. ತನ್ನದೇ ಕಾರ್ಯದಿಂದ ಮತ್ತು ಸೂರ್ಯ ಹೊರಸೂಸುವ ಇನ್ಪಾçರೆಡ್ ಕಿರಣಗಳನ್ನು ಕನ್ನಡಿ ಫಲಕಗಳು ಹೀರಿಕೊಂಡರೆ ಬಿಸಿಯೇರುವ ಸಾಧ್ಯತೆ ಇರುವುದರಿಂದ ಈ ಮಿಶ್ರ ಲೋಹದ ಲೇಪನಗಳು ಇನ್ಪಾçರೆಡ್ ಕಿರಣಗಳನ್ನು ಹೀರಿಕೊಳ್ಳದಂತೆ ಮಾಡಿ ಇಡೀ ವ್ಯವಸ್ಥೆಯೇ ತಂಪಾಗಿರುವಂತೆ ಮಾಡುತ್ತದೆ. ಇದರಲ್ಲಿ ಬಹು ಮುಖ್ಯವಾಗಿ ಸ್ಪೇಸ್ ಕ್ರಾಫ್ಟ್ ಬಸ್ ಎನ್ನುವುದು ಇದೆ, ಇದೇ ಅದರ ಮಿದುಳು ಅನ್ನಬಹುದು. ದೂರದರ್ಶಕದಲ್ಲಿರುವ ಇಂಟಿಗ್ರೇಟೆಡ್ ಸೈನ್ಸ್ ಇನ್ಸ್ಟುçಮೆಂಟ್ ಮಾಡ್ಯೂಲ್, ಆಪ್ಟಿಕಲ್ ಟೆಲಿಸ್ಕೋಪ್ ಎಲಿಮೆಂಟ್, ಎರಡು ಭಾಗಗಳು ನೇರವಾಗಿ ಸ್ಪೇಸ್ ಕ್ರಾಫ್ಟ್ ಬಸ್ ನೊಂದಿಗೆ ಸಂಪರ್ಕದಲ್ಲಿರುತ್ತವೆ. ಇದರಲ್ಲಿ ಪ್ರಭಾವಶಾಲಿ ಗಣಕಯಂತ್ರವಿದ್ದು ಅದು ದೂರದರ್ಶಕದಿಂದ ಪಡೆದ ವಿವರಗಳನ್ನು ಸಂಗ್ರಹಿಸಿ ವೈಜ್ಞಾನಿಕ ರೀತಿಯಲ್ಲಿ ಮಥಿಸಿ ಭೂ ಕೇಂದ್ರಕ್ಕೆ ಕಳಿಸುವ ವ್ಯವಸ್ಥೆ ಇದೆ. ನಿಯರ್ ಇನ್ಪಾçರೆಡ್ ಕ್ಯಾಮೆರಾ, ಸ್ಪೆಕ್ಟೋಗ್ರಾಫ್, ಇನ್ಪಾçರೆಡ್ ಇಮೇಜರ್ಗಳು ಎನ್ನುವ ಪ್ರಮುಖ ಸಾಧನಗಳು ಸಹ ಇವೆ. ಇವೆಲ್ಲವೂ ಸ್ಪೇಸ್ ಕ್ರಾಫ್ಟ್ ಬಸ್ನೊಂದಿಗೆ ನಿರಂತರ ಸಂಪರ್ಕದಲ್ಲಿ ಇರುತ್ತವೆ.
ಅದರ ರಚನಾತ್ಮಕ ವಿವರಗಳು ಇರಲಿ, ಅದು ನಭಕ್ಕೆ ಚಿಮ್ಮಿರುವ ಉದ್ದೇಶವಾದರು ಏನು?
೧೩.೫ ಶತಕೋಟಿ ವರ್ಷದ ಹಿಂದೆ ಮಹಾಸ್ಪೋಟದಿಂದಾಗಿ ಈ ಆಕಾಶಕಾಯಗಳು, ನಕ್ಷತ್ರಗಳು, ನಿಹಾರಿಕೆಗಳು, ಗ್ರಹಗಳು, ಅಸಂಖ್ಯಾತ ಗೆಲಾಕ್ಸಿಗಳು ರೂಪುಗೊಂಡವೆAದು ನಂಬಲಾಗಿದೆ. ಇನ್ನೂ ಥಿಯರಿಯ ಬಗ್ಗೆ ಗೊಂದಲಗಳು ಬಹಳಷ್ಟು ಇವೆ. ಅಂದು ಸಂಭವಿಸಿದ ಮಹಾಸ್ಪೋಟದ ಕುರುಹುಗಳು, ಅವಶೇಷಗಳು, ಅನಂತ ನಭೋ ಮಂಡಲದಲ್ಲಿ ಹರಡಿಕೊಂಡಿ ರಬಹುದು. ಅವುಗಳು ಈಗ ಇದೆಯೇ? ಇದ್ದರೆ ಯಾವ ಸ್ಥಿತಿಯಲ್ಲಿ ಇದ್ದಾವೆ, ಅಸಲಿಗೆ ಅಂತಹ ಸ್ಪೋಟಕ್ಕೆ ಕಾರಣ
ವೇನು? ಈ ಬ್ರಹ್ಮಾಂಡದ ಸೃಷ್ಠಿಗೆ ಅದರಲ್ಲಿರುವ ಮೂಲಧಾತುಗಳೇನು? ಎನ್ನುವ ಸತ್ಯಾಸತ್ಯತೆಯನ್ನು ಅರಿಯಲು
ಬ್ರಹ್ಮಾಂಡದಲ್ಲೆಲ್ಲಾ ಸೂಕ್ಷ ಕಣ್ಣನ್ನು ಆಡಿಸಲಿದೆ. ನಮ್ಮ ಹತ್ತಿರದ ಗ್ಯಾಲಕ್ಸಿಗಳಲ್ಲಿ ವಾಸಯೋಗ್ಯ ಗ್ರಹಗಳು ಇರುವವೆ?
ಇನ್ಯಾವುದೋ ನಕ್ಷತ್ರ ಪುಂಜದ ಗ್ರಹದಲ್ಲಿ ಏಲಿಯನ್ಗಳು ಇರುವರೆ? ಹೀಗೆ ಹತ್ತಾರು ಕಾರ್ಯಭಾರವನ್ನು ಹೊತ್ತು ಮುಂದಿನ ಹತ್ತು ವರ್ಷಗಳ ತನಕ ನಮಗೆ ದಿನಕ್ಕೆ ಸುಮಾರು ಅರವತ್ತು ಗೀಗಾಬೈಟಿನಷ್ಟು ವಿವರಗಳನ್ನು ನೀಡಲಿದೆ. ಇಪ್ಪತ್ತು ದೇಶಗಳ ವಿಜ್ಞಾನಿಗಳು ಸತತವಾಗಿ ಹಗಲಿರುಳು ಶ್ರಮಿಸಿ ನಿರ್ಮಿಸಿದ ಈ ಶಕ್ತಿಶಾಲಿ ದೂರದರ್ಶಕ. ಭವಿಷ್ಯದಲ್ಲಿ ಇದು ನೀಡುವ ವಿವರಗಳು, ಮಾಹಿತಿಗಳು ಭೂಮಿಯ ಎಲ್ಲಾ ಜನಾಂಗದ ಒಳಿತಿಗಾಗಿ ಭವಿಷ್ಯದ ಉತ್ತಮ ದಿನಗಳಿಗಾಗಿ ಆಸರೆಯಾಗಲಿ. ಇದು ಯಶಸ್ವಿಯಾಗಿ ಕಾರ್ಯ ನಿರ್ವಹಿಸಲಿ ಎಂದು ಆಶಿಸೋಣ.